James Joyce

Dr James Joyce (* 2. Februar 1882 z Dublin; † 13. Januar 1941 z Züri) isch en irische Romanschriftsteller und Dichder gsi. Er gältet as äine vo de iiflussriichste Autore vo dr Modärne im früeje 20. Joorhundert. Sis bekanntiste Wärk isch Ulysses, wo 1922 uusechoo isch. Din ziet er Paralleele zwüsche Episoode us dr Odyssee vom Homer mit was em Protagonist, em Leopold Bloom, bassiert am ene gwöönlige Daag z Dublin. Er setzt drfüür verschiideni literarischi Stil ii und brucht dr „Stream of Consciousness“, uf Dütsch Stroom vom Bewusstsii, bzw. dr sogenannti inneri Monolog. Anderi wichdigi Wärk si Dubliners, e Züklus vo fufzää Churzgschichte wo 1914 veröffentligt worden isch, und d Romään A Portrait of the Artist as a Young Man (1916, dütsch Ein Porträt des Künstlers als junger Mann), Finnegans Wake (1939) und drei Gedichtbänd. Er het au e Theaterstück gschriibe und für Zitige. Sini Brief si au veröffentligt worde.